ILOILO CITY – Kinahanglan nga hatagan sang humanitarian consideration sang tagdumalahan sang kompaniya ang mga empleyado nga indi makatrabaho bangud nga wala sang biyahe ang pumpboat nga may ruta Iloilo-Guimaras vice versa.
Sa interview sang Bombo Radyo kay Department of Labor and Employment 6 Regional Director Engr. Cyril Ticao, iya ginpahayag nga nagakadapat nga maghatag sang konsiderasyon ang kompaniya nga ginatrabahu-an sang isa ka empleyado nga apektado sang isa ka trahedya.
Suno kay Engr. Ticao, indi nagakadapat nga hatagan sang suspension ang mga empleyado nga indi makatrabaho bangud nga pumpboat kag Roll-On Roll-Off vessel lamang ang mahimo nga sakyan patabok sa syudad sang Iloilo kag patabok sa probinsya sang Guimaras.
Kun may yara sang mabug-at nga rason nga dapat hatagan sang suspension ang isa ka empleyado, indi mamalabag ang Department of Labor and Employment.
Nakahanda naman nga magbulig ang nasambit nga ahensya suno kay Ticao sa tion nga may yara sang magpalab-ot sang reklamo tuhoy sa mga trabahador nga apektado sang pagpauntat sang biyahe sang mga sakayang pandagat.
