BUENAVISTA,GUIMARAS– Nagapangabay ang Local Government Unit sang Buenavista, Guimaras nga kun mahimo makapatigayun sang assessment ang Philippine Coast Guard kag Maritime Industry Authority.
Ini ang may kaangtanan sa pagpa-untat sang biyahe sang mga pumpboat nga may ruta Iloilo-Buenavista vice versa.
Sa exclusive interview sang Bombo Radyo kay Buenavista Mayor Eugene Reyes, iya ginpahayag nga madamo na nga sektor ang naapektuhan sang pagpauntat sang biyahe sang pumpboat.
Una nga apektado diri suno kay Reyes amo ang operators kag nagabiyahe sang pumpboat, porters sa pantalan sang Iloilo kag Buenavista lakip na ang iban nga sektor sang ekonomiya sa banwa.
Suno kay Reyes, nagreklamo man sa iya ang mga nagabiyahe sang trisikad kag trisikol bangud halos wala na sang pasahero.
Samtang nagadugay ang pagpauntat sang biyahe sang mga sakayang pandagat, nagadugang man suno sa natungdan ang pagdako sang ila ginapangatubang nga problema.
Ang mga Automated Teller Machines sa mga bangko nga yara sa ila banwa ang halos wala na sang unod lakip na ang mga suplay sang pagkaon kag iban pa nga mga kinahanglanon.
Kun tani suno kay Reyes, makahatag sang klaro nga abiso ang Philippine Coast Guard kag Maritime Industry Authority sa kun ano ang nagakadapat buhaton.
Nagalaum man ang natungdan nga bisan paano, may makabiyahe man nga RORO ukon fastcraft sa bahin sang Buenavista agud indi man sila tuman nga maapektuhan.
Nahibaluan nga sa subong nagapatigayun na sang profiling ang Department of Social Welfare and Development agud makahatag sang pinansyal nga bulig lakip na ang Department of Labor and Employment nga magahatag naman sang livelihood para sa sailors kag porters.
