CARLES, ILOILO – Ginpaidalom na sa State of Calamity ang Carles, Iloilo bangud sa epekto sang malain nga tiyempo.
Sa interview sang Bombo Radyo kay Mayor Siegfredo Betita, iya ginpahayag nga halos isa na ka semana ang pag-ulan tuga sang weather disturbance rason nga apektado man ang palangabuhi-an sang mga pumuluyo.
Suno kay Betita, ang pagpangisda ang nagapanguna nga palangabuhi-an sa ila banwa ilabi na sa isla Gigantes.
Ginpahayag ni Betita nga sa isla Gigantes, ginagutom ang mga pumuluyo bangud indi sila makatabok sa banwa agud nga magbakal sang pagkaon kag iban pa nga kinahanglanon.
Magluwas diri, may yara man sang mga relief goods nga para kun tani sa mga pumuluyo apang wala pa ini napanghatag bangud nga ginadumili-an pa ang pagbiyahe sang mga sakayang pandagat.
Ang ginapahanugutan lang suno sa natungdan amo ang mga sakayang pandagat nga nagabug-at sang 250 gross tonage.
