ILOILO CITY – Magapatigayon sang labing una ‘5-day series of concerts, lectures and master classes for piano and voice’ ang University of San Agustin.
Sa interview sang Bombo Radyo kay Dr. Clement Acevedo, isa ka pianist, manunudlo sa Conservatory of Music kag Director sang Center for Heritage and Indigenous Culture sang University of San Agustin, iya ginpahayag nga ang nasambit nga aktibidad amo ang The First Jovita Fuentes and Jose Contreras Music Institute kag may tema nga ‘Linking the Art of German Lied and Filipino Kundiman’.
Suno kay Dr. Acevedo, ang pagpatigayon sang concert, lecture kag master classes ang isa ka pagdumdum kag paghatag sang pagkilala sa internationally renowned local soprano kag concert pianist nga sanday Jovita Fuentes kag Jose Contreras nga lunsay tumandok sang Capiz.
Ginpahayag ni Dr. Acevedo nga ang 5-day activity ang maga-umpisa sa Agosto 20-24 kag ini ang bukas sa tanan nga maluyag magparehistro.
Sa adlaw, patigayunon ang mga lecture kag master classes samtang sa gab-i naman ang concert nga patigayunon sa University of San Agustin kag sa Iloilo Museum of Contemporary Art.
Magaserbe nga dinapit nga bisita ang mga Filipino Musicians lakip na ang Grammy Award-Winning Baritone nga si Kevin McMillan.
Lakip sa iga-perform sa concert amo ang mga Filipino kag foreign piano and song piece.
