ILOILO – Ang malain nga tiyempo ang nangin rason kun nga-a indi makadali-dali sa pagpatigayon sang rescue ang Philippine Coast Guard sang natabo ang Iloilo Strait tragedy.
Sa interview sang Bombo Radyo kay Chief Petty Offcer Bernard Bernasol, sub-station commander sang Philippine Coast Guard -Iloilo Fish Port Complex, iya ginpahayag nga sang ila nahibalu-an nga nagkulob ang MB Chi-Chi, MB Keziah 2 kag MB Jenny Vince, gilayon sila nga nagpatigayon sang rescue operation dala ang lifejackets, lifebouy ring kag wasay.
Sa tagsa ka rescue operation suno kay Bernasol, ila nga ginakabig nga ang ila pagaluwason amo ang ila mga himata.
Nangin emosyunal si Bernasol samtang ginadumdum ang mga nagkalatabo sa rescue operation.
Bangud sa mabaskog nga balod kag mamadlos nga hangin, indi man sila makadali-dali sa pag-rescue.
Sa una nga hugnat sang rescue operations suno sa natungdan, may yara sila sang na-rescue nga mga pasahero.
Sa bulig sang tug boat, ila nga ginguyod ang nagkulob nga MB Jenny Vince apang bisan ang katig nga ginbutangan sang higot ang nautod bangud sa kabug-aton sang pumpboat, mabaskog nga balod kag mamadlos nga huyop sang hangin.
Ini ang rason kun nga-a nakalab-ot sa Dumangas, Iloilo ang MB Jenny Vince kun sa diin madamu sang mga bangkay ang nakuha.
Samtang, suno naman kay Senior Chief Petty Officer Marlon Buenavista, sub-station commander sang Philippine Coast Guard-Dumangas, mahimo nga nakadugang sa kabug-aton sang MB Jenny Vince amo ang tarapal sa diin madamu sang bagahe sang mga pasahero ang nakasab-it.
Ginpahayag ni Buenavista nga ila gingamitan sang boom truck agud nga mapasaka sa pantalan ang nagkulob nga pumpboat
