GUIMARAS- Indi na mabatas sang Local Government Unit sang Buenavista, Guimaras nga pabay-an nga maglawig pa ang ginaantos nga sitwasyon sang mga pumuluyo sang banwa kasunod sang Iloilo Strait tragedy nga ginkamatay sang 31 ka mga tawo.
Sa interview sang Bombo Radyo Iloilo kay Buenavista Mayor Eugene Reyes, iya ginpahayag nga bangud sa nagapadayon nga suspension sang byahe sang mga pumpboats nga may ruta Iloilo- Guimaras vice-versa,kinahanglan pa nga magbyahe sang taga Buenavista padulong sa RoRo port sa Hoskyn, Jordan, Guimaras sa diin magapila pa ang mga ini sang pila ka oras antes makasakay sa fastcraft ukon roro patabok sa Syudad sang Iloilo.
Ginpahayag man sang alkalde nga nagmahal man ang presyo sang mga balaklon sa Guimaras nga ginakompra gikan sa Iloilo bangud ginapatungan sang dako sang mga negosyante agud mabawi ang ila ginaplite.
Ginakwestiyon naman sang natungdan ang indi pagpahanugot sang ahensya nga temporaryo nga makabyahe ang mga fastcraft sa Buenavista Wharf- Iloilo vice-versa.
Kaangot sini, ginpahayag ni Mayor Reyes nga personal ini nga magapadulong sa talatapan sang Maritime Industry Authority agud i-apelar ang pagbalik sang byahe sang mga pumpboats.
