GUIMARAS – Nagpadala sang sulat si Guimaras Governor Samuel Gumarin kay Presidente Rodrigo Duterte agud nga hingyuon ang pagbalik sang biyahe sang mga pump boat nga may ruta Iloilo-Guimaras vice versa.
Ini ang may kaangtanan sa nagaginutok nga pasahero sa Jordan Wharf bangud sa kakulang sang sakayang pandagat nga nagabiyahe.
Nakasaad sa sulat ni Gumarin nga tuman nga naapektuhan ang palangabuhi-an sang pumuluyo kag ang ekonomiya sang Guimaras bangud sa untat-biyahe.
Suno kay Gumarin, iya nga nahangpan ang desisyon nga ipauntat ang biyahe sang pumpboat tubtub nga indi matapos ang imbestigasyon sa natabo nga Iloilo Strait tragedy sang Agosto 3.
Sa pihak sini, ginpanindugan ni Gumarin nga ang pagpalawig sang untat-biyahe ang makabig nga huol sa mga pasahero kag pumpboat operator.
Magluwas diri, nagpabutyag man sang pagsakdag si Gumarin sa ginaduso nga modernization sa sakayang pandagat bangud nga para man ini sa kaayuhan sang mga pasahero.
Indi man malikawan suno kay Gumarin nga maapektuhan ang palangabuhi-an sang mga motorbanca operator kun ipatuman na ang modernization.
