JORDAN, GUIMARAS – Nagpatigayon sang special trip subong nga gab-i ang fastcraft agud nga mabuhinan ang mga na-stranded nga pasahero sa Jordan wharf sa Guimaras.
7:30 sang gab-i natalana ang last trip sang fastcraft apang may yara sang special trip nga ginpatigayon agud nga mabuhinan ang numero sang pasahero nga yara sa pantalan.
Sa interview sang Bombo Radyo kay Inday, indi niya matuod nga panagalan, iya ginpahayag nga gindul-ungan na lang niya sang pagkaon ang iya hinablos nga nagpila humalin sang aga apang nagab-ihan lang, wala man sa gihapon nakasakay.
Ginpahayag sang tiya nga tuman gid ang iya nga pag-ugtas bangud nga wala sang klaro ang sistema sa pagpasakay sa mga pasahero.
Samtang suno naman kay Ian, isa sa mga pasahero, iya ginpahayag nga inoras na siya nga nagapila agud nga makasakay sa RORO vessel dala ang iya motorsiklo.
Ginpahayag ni Ian nga nagab-ihan lang apang wala gid siya nakasakay bangud nga ang iban nga may yara sang kilala nga personnel sa pantalan ang mas nauna pa nga nakasakay ipaanggid sa ila nga nagapila.
Nagaugtas naman ang isa ka fish vendor bangud nga atrasado ang ila nga pagbiyahe.
Sa interview sang Bombo Radyo sa fish vendor nga nagpahinago sang pangalan, iya ginpahayag nga naglub-ok na ang iya ginbakal nga isada sa Carles, Iloilo.
Suno sa fish vendor, nagakalabalaka siya bangud nga wala pa nakuha sa Tagbak Terminal ang iya ginbakal nga isda.
Kun tani suno sa iya, may yara sang maathag nga abiso nga ginhatag sa mga pumuluyo agud nga indi sila magdagsa sa pantalan.
