ILOILO CITY – Balikan buwas nga adlaw sang mga personnel sang Public Safety and Transportation Management Office kag Task Force Anti-Squatting and Illegal Structures Unit ang mga permanent illegal structures sa pila ka barangay sa City Proper area.
Ini ang may kaangtanan sa nagapadayon nga Oplan Hawan sa mga dalanon sa syudad sang Iloilo.
Sa interview sang Bombo Radyo kay Fernando Jose ‘Boyet’ Rico, executive assistant for Barangay Affairs, iya ginpahayag nga subong nga adlaw, nagpatigayon sang Oplan Hawan sa Barangay Magsaysay, Kauswagan, Nonoy, Concepcion, Zamora-Milleza kag Legaspi-Dela Rama.
Ang iban sa mga obstruction kasubong sang mga guba nga salakyan nga gina-park sa higad sang dalan ang napangkuha na samtang ginpangguba naman ang iban nga istraktura.
Suno kay Rico, ang iban sa mga permanent structures kasubong sang barangay hall ang ginmarkahan na sang ekis bilang patimaan nga ang nasambit nga istaktura ang pagagub-on bangud nagasablag sa dalan.
Subong nga adlaw suno kay Rico, pagaumpisahan ang pagpangguba sa mga permanent structures.
Ang mga salakyan naman nga makita nga naka-park sa higad sang dalan ang pagakuhaon ukon pagagub-on.
Ginatugyan naman sang natungdan sa mga barangay officials ang katungdanan sa pagpabilin nga hilway sa osbtruction ang mga dalan nga sakop sang ila area of responsibility.
