ILOILO CITY – Igapatuman na sang Philippine National Police ang centralized system sa pagkuha sang police clearance.
Sa tagsa ka probinsya kag syudad, may yara sang napili-an nga pilot police police station
Diri sa syudad sang Iloilo, ang Police Station 1 ang magapanguna sa paglunsyar sang centralized system.
Sa interview sang Bombo Radyo kay Police Lt. Col. Jonathan Pablito, hepe sang Police Station 1, iya ginpahayag nga paagi sa centralized system, madali nga mahibalu-an kag madakpan ang mga kriminal sa pungsod.
Magluwas diri, mas maid-id ang centralized system ipanggid sa manual nga application sang police clearance bangud nga madali nga mahibalu-an ang identity sang aplikante.
Lakip sa proseso suno kay Pablito amo nga dapat nga magparehistro online paagi sa https://pnpclearnce.ph, mag fill-up sang online form agud nga makakuha sang reference number.
Pagkatapos, magbayad paagi sa online account sang LandBank, Bancnet ukon G-cash kag i-print ang payment confirmation slip kag ang electronic official receipt bilang pamatuod sang pagbayad.
Sa pagkuha sang police clearance, ipakita sa on-duty police ang ginprint nga reference number, proof of payment kag duha ka valid identification cards.
Magpakuha sang biometrics kag hulaton nga matapos ang proseso agud nga makakuha sang police clearance.
