GUIMARAS – Nagpatigayon sang special trip ang BRP BATAK sang Philippine Navy agud nga mag-transport sang pasahero gikan sa syudad sang Iloilo padulong sa Guimaras kag vice versa.
Ini bangud nga 6:00 sa aga tubtub 6:00 sa gab-i lamang ang biyahe sang mga pump boat.
Sa interview sang Bombo Radyo kay Ms. Leizl Galan, information officer sang Guimaras Provincial Government, iya ginpahayag nga madamu sang mga pasahero ang wala naka-abot sa last trip sang mga pump boat rason nga nagpakig-angot si Gov. Samuel Gumarin sa Philippine Navy Western Visayas agud nga magpangayo sang bulig sa transportasyon.
Suno kay Galan, bisan nga ginpahanugutan na ang pagbiyahe sang mga pump boat apang may yara sang pila ka restrictions nga ginapatuman.
Ang mga RORO vessel kag fast craft naman suno kay Galan ang naka stand-by kun kinahanglanon ang augmentation force sa pag-transport sang mga pasahero.
Ang BRP BATAK nga nag-abot sa syudad sang Iloilo subong nga adlaw, ang may yara sang capacity nga 400 passenger sa isa ka trip.
Ang pagbiyahe sang Balikpapan-class heavy landing craft sang Philippine Navy ang libre para sa mga pasahero.
