GUIMARAS – Pilason ang lalaki nga nangin pasahero sang motorsiklo matapos nga ginbuno ini sang ice pick sang driver sa Ravina, Sibunag, Guimaras.
Ang biktima amo si Collin Maglantay, 28 anyos, tumandok sang Antique apang temporaryo nga nagatinir sa Nueva Valencia, Guimaras.
Sa interview sang Bombo Radyo kay Maglantay, may isa man ka pasahero ang driver nga estudyante nga babaye ginabanta 18 anyos ang edad.
Suno kay Maglantay, nagliko ang driver sa lain nga direksyon kag nagpahayag nga may hapiton lamang ini.
Apang nakabunggo sila sa hilamonan kag natumba.
Sa baylo nga buligan sang driver ang iya mga pasahero, ginbuno pa sang driver si Maglantay kag gilayon naman nga nagdalagan ang babaye apang ginlagas man ini sang driver.
Pahayag ni Maglantay, kaangay nga may tuyo ang driver nga himuslan ang babaye.
Pilas sa likod nga bahin ang naangkon sang biktima kag iya pa nga gintinguhaan nga malagas ang driver.
Dugang pa sang natungdan, nasipaan niya ang driver apang nakapalagyo ini dala ang bag ni Maglantay nga may unod nga cellphone, kwarta kag mga ATM.
Sa subong, padayon nga gina imbestigahan sang kapulisan ang natabo agud mahibaluan ang suspek pinaagi sa nakuha nga motorsiklo sang driver bangud nabilin niya ini.
