ILOILO CITY -Gin-akusaran sang Executive Assistant for Barangay Affairs ang punong barangay sang Bolilao, Mandurrio, Iloilo City nga wala sang tion nga magpatigayun sang clearing operations.
Sa interview sang Bombo Radyo kay Mr. Fernando Jose “Boyet” Rico, Executive Assistant for Barangay Affairs, iya ginpahayag nga sang nagpatigayun sila sang clearing operations, wala gid nakakadto si Punong Barangay Arsenio Pedregosa.
Suno kay Rico, may yara sang tanod outpost kag material recovery facility ang Barangay Bolilao nga yara na sa dalan.
Ginpahayag ni Rico nga gina-parkingan man sang salakyan ang pareho nga side sang dalan rason nga naghatag siya sang isa ka semana nga plaso agud makuha ang mga obstruction sa dalan.
Samtang, nagdepensa naman si Punong Barangay Arsenio Pedrosa sa akusasyon batok sa iya.
Sa interview sang Bombo Radyo kay Pedrosa , iya ginpahayag nga wala siya nagapabaya sa road clearing operations apang sang tion nga nagkadto sa iya barangay ang grupo ni Rico, may yara siya sang transaksyon sa bangko may kaangtanan sa ila nagahilapit nga lakbay-aral.
Kun tani suno kay Pedrosa, gindayon lang ang road clearing operation bisan wala siya bangud yara man ang iya mga barangay kagawad kag barangay tanod nga magabulig sa grupo ni Rico.
Ginpahibalo man niya suno kay Pedrosa ang mga maapektuhan sang road clearing operations, duha ka semana na ang nakaligad.
Sa bahin naman sang illegal parking suno kay Pedrosa, nahambalan na niya ang mga tag-iya sang salakyan.
Handa siya nga magbulig suno sa natungdan bangud iya nahibaluan nga ang nasambit nga aktibidad ang ginapatigayun para sa kaayuhan sang tanan.
