GUIMARAS – Maga-sponsor sang resolusyon si Guimaras Vice Gov. John Edward Gando agud nga magpatigayon sang Congressional Inquiry tuhoy sa natabo nga Iloilo Strait tragedy.
Sa interview sang Bombo Radyo kay Gando, iya ginpahayag nga ang iya nga pag-sponsor sang resolusyon ang natalana sa Martes, kadungan sang session sang Sanguniang Panlalawigan sang Guimaras.
Suno kay Gando, lakip sa mga imbitado sa Congressional Inquiry amo ang mga survivor, mga tiglawas sang Philippine Coast Guard kag sang Maritime Industry Authority.
Ginpahayag ni Gando nga kahigayunan na para sa Philippine Coast Guard nga makapaathag matapos napaslawan nga makatambong sa ginpatigayon nga Legislative Inquiry.
Gin-athag ni Gando nga indi pagpamasol sa pagpamuno ni anay Philippine Coast Guard Iloilo Station Commander Perlita Cinco ang katuyu-an sang pagpatigayon sang Congressional Inquiry kundi dapat lang nga maathagan ang tanan.
Sa pagkamatuod suno sa natungdan, ila gid nga ginakilala ang paghimakas sang nasambit nga ahensya sa ginpatigayon nga rescue operation.
