ILOILO CITY – Iligal nga droga ang posible motibo sang riding in tandem suspects nga nagluthang patay sa isa ka ex-convict sa Brgy. Taal, Molo, Iloilo City.
Ang biktima amo si Robert Isobal, 43, sang Brgy. East Timawa, Molo.
Sa interview sang Bombo Radyo kay Police Maj. Engelbert Banquillo, hepe sang Molo Police Station, iya ginpahayag nga samtang nagapanghimos sang talaba si Isobal, ginlabayan siya sang duha ka mga lalaki nga nakasakay sa motorsiklo sa diin ang angkas nga lalaki ang nagpanaog kag nagpalapit sa biktima.
Sang ginpalapitan na sang lalaki si Isobal, ginkaptan sini ang ulo sang biktima kag gintiro.
Suno kay Banquillo, natumba si Isobal kag liwat pa nga gintiro sang lalaki sa nagkalain-lain nga bahin sang lawas.
Nakaangkon sang igo sa tuo nga mata, dughan, kamot kag tyan ang biktima.
Ang duha ka mga riding in tandem suspects ang nakasuksok sang jacket, naka shorts kag ang motorsiklo nga gingamit ang wala naman sang plaka.
Tinguhaan sang Molo PNP nga tsekyaron ang lugar agud ma lantaw ang Closed Circuit Television footage kun may yara.
Nahibaluan nga sang Agosto 14 lamang nakaguwa halin sa presohan ang biktima bangud man sa kaso sang iligal nga droga.
