BAROTAC VIEJO,ILOILO – Nakahanda na ang Bureau of Jail Management and Penology Region-6 nga magpasaka sang kaso administratibo sa myembero sang nasambit nga talatapan bangud sa pagpatay sa isa ka lalaki sa Poblacion Barotac Viejo, Iloilo.
Ang suspek amo si Jail Officer 1 Ryan Tupas samtang ang napatay nga biktima amo si Ernesto Pescador Jr.
Sa interview sang Bombo Radyo kay Sr. Jail Officer 3 Leo Laserna, Regional Investigation and Prosecution Division Chief, iya ginpahayag nga padayon nga nagatrabaho sa BJMP Barotac Viejo si Tupas.
Apang ginakumpleto na nila ang tanan nga papeles agud makapasaka sang kaso kun ano ang mangin rekomendasyon sang legal team.
Suno kay Laserna, nakapadala na siya sang memorandum kay Tupas nga mag-report sa BJMP Region 6 sa Byernes, Agosto 25.
Dugang pa sang natungdan, kinahanglan nga dal-on ni Tupas ang issued firearm kag isurrender sa ila opisina, magpasa sag position paper bilang paathag kun ngaa indi siya pagpasakaan sang kaso administratibo.
Natukiban nga ang gingamit ni Tupas sa pagluthang patay kay Pescador amo ang 45 caliber pistol samtang ang issued firearm naman sang BJMP sa iya amo ang 9mm.
Nahibaluan nga may ginpatay man si Tupas sang mga tinalikdan nga tuig sa Banate,Iloilo apang wala na nagfile kaso ang pamilya.
