ILOILO CITY– Patay ang isa ka lalaki matapos naluthangan sa Brgy. Our Lady of Lourdes, Jaro, Iloilo City.
Ang biktima ang ginkilala nga si Rodolfo Mahinay, 45, samtang ang suspek naman amo si Jimmy Yudelmo, 56 anyos kag pareho nga residente sang nasambit ng lugar.
Sa interview sang Bombo Radyo kay Police Executive Master Sergeant Caesar Pinuela, imbestigador sang Jaro Police Station, iya ginpahayag nga duha ka beses ginluthang ni Yudelmo si Mahinay nga naigo sa tiyan.
Suno kay Pinuela, 38 caliber revolver ang gingamit sa pagtiro sa biktima sa diin duha ka lupok ang nabatian sang mga residente sa lugar.
Nakuha kay Yudelmo ang duha ka empty shells kag tatlo ka live ammunitions sang nasambit nga armas luthang.
Samtang, sa interview sang Bombo Radyo kay Yudelmo, iya ginpanginwala nga siya ang nagtiro patay kay Mahinay.
Suno kay Yudelmo, wala sila sang away ni Mahinay biktima kag ilabi na nga wala sila naka-updanay sa pag-inom.
Ginpahayag ni Yudelmo nga yara siya sa tyangge nagainom sang gindakop sang mga Barangay Tanod.
Ginpanginwala man ni Yudelmo nga siya ang nagapanag-iya sang caliber 38 revolver nga gingamit sa pagluthang kay Mahinay.
Nahibaluan nga gindala sa hospital ang biktima apang ginbawian sang kabuhi.
