ILOILO CITY- Napalab-ot na sang grupo sang mga vendors sa mga merkado publiko sa syudad sa tagdumalahan sang Iloilo Fishing Port Complex ang ila reklamo tuhoy sa pag-retail sang isda sa sulod mismo sang fishing port.
Ini matapos ang ginpatigayon nga pagsinapol nga ginpatawag ni Iloilo City Councilor Ely Estante,chairman sang committee on Market and Slaughterhouse, upod ang iban nga natungdan nga talatapan kaangay sang Local Economic Enterprise Office, tagdumalahan sang Iloilo Fishing Port Complex,Fisheries Development Authority, Licensing and Permit Division, kag Federation of Market Vendors.
Sa interview sang Bombo Radyo Iloilo kay Mr. Charlie Chan, presidente sang Federation of Market Vendors, iya ginpahayag nga sa ginpatigayon nga pagsinapol, gin-ako ni Mr. Alexis Inocentes, ang officer in charge sang Iloilo Fishing Port nga madamo gid man sang nagaretail sang isda sa sulod sang complex apang indi man ini madali-dali nga dulaon ukon pauntaton bangud magakahulugan man ini sang pagkadula sang ila palangitan-an.
Suno kay Chan, may natalana nga ikaduha nga pagsinapol sa diin ginalauman nga may madihon na nga mga solusyon para sa ila problema.
Nahibaluan nga madugay na nga reklamo sang mga fish vendors sa mga merkado publiko sa syudad nga indi na sila mabaklan bangud may nagaretail na sang isda sa sulod mismo sang fishing port complex sa mas barato nga presyo.
