ILOILO CITY – Ginakabig ni Iloilo City Mayor Jerry Treñas nga seryoso nga akusasyon ang ginapangatubang nga electioneering sang tatlo ka mga regular employee sang Iloilo City Government.
Ini matapos nga nabaton na ni Treñas ang written complaint gikan sa apat ka mga job hire nga sanday Dennis Biñas, Julia Bitonga, Jena Jose kag Donephine Dominggo.
Sa interview sang Bombo Radyo kay Treñas, iya ginpahayag nga ang written complaint ang napetsahan sang Agosto 22 kag iya ini nabaton kahapon nga adlaw.
Suno kay Treñas, iya nga ginpasa sa City Legal Office ang nasambit nga reklamo para sa imbestigasyon.
Ginpahayag ni Treñas nga kinahanglan nga mausisa kun bala matuod nga may yara sang ginlapas nga layi ang mga ginareklamo nga sanday Danny Tan, Vincent Dela Cruz kag Eireen Manikan.
Ginatugyan sang alkalde sa City Legal Office ang paghimu sang rekomendasyon batok sa tatlo ka mga empleyado.
Nahibalu-an nga nakasaad sa reklamo sang mga job hire nga ginpilit sila nga magsuporta kag magbulig sa kandidatura ni anay Iloilo City Mayor Jose Espinosa III.
Kun indi sila magbulig sa kandidatura ni Espinosa, pahalinon sila bilang job hire.
Sa subong, wala pa sang pahayag sanday Tan, Dela Cruz kag Manikan tuhoy sa reklamo batok sa ila.
Nahibalu-an nga santo sa layi, ginadumili-an ang mga government employee nga magpakigbahin ukon magsuporta sa kandidatura sang isa ka pulitiko.
