ILOILO CITY – Gin-athag sang pinuno sang Iloilo City Social Hygiene Clinic nga ang pagpatigayon sang smearing sa mga commercial sex workers tagsa ka semana sa mga night clubs ang indi para sa ila mga customer.
Sa interview sang Bombo Radyo kay Dr. Ma. Odeta Villaruel, pinuno sang Iloilo City Social Hygiene Clinic, iya ginpahayag nga ang smearing nga ginapatigayon ang may katuyuan nga ma monitor kun may yara sang balatian ukon impeksyon ang isa ka commercial sex worker.
Suno kay Villaruel, sa tion nga may matukiban nga balatian, hatagan nila gilayon sang bulong agud nga matapna.
Magluwas sa smearing nga ginahimo sang Iloilo City Social Hygiene Clinic, ginasekyar man ang mga pink cards sang mga commercial sex workers.
Ang pink card amo ang nagaserbe nga health certificate nga isa sa mga requirements sa night clubs.
Antes makuha ang pnk card, kinahanglan nga kompleto ang mga dokumento kaangay sang working permit, barangay clearance, police clearance kag mayor’s clearance.
Kinahanglan man dugang pa ni Villaruel nga i-renew ang pink card tagsa ka anom ka bulan antes ma expire.
Naghingyo man ang natungdan sa mga night clubs, bars kag restobars nga sundon ang tanan nga pagsulundan nga nasaad sa Executive Order 46 agud nga wala sang mangin problema kag malipay man ang Iloilo City Government.
