ILOILO CITY – Mahimo nga maapektuhan ang iban nga sahi sang living organisms sa suba ukon sa baybay sa tion nga magdamu ang mosquito fish nga isa sa mga nakita nga sabat agud nga matapna ang Dengue Hemorrhagic Fever.
Sa interview sang Bombo Radyo kay Prof. Joshua Regalado, Assistant Professor sa College of Fisheries sa University of the Philippines-Visayas, iya ginpahayag nga ang mosquito fish ang isa ka sahi sang isda nga naghalin sa Estados Unidos nga gindala kag ginpadamu diri sa Pilipinas sang 1913 bilang sabat sa pagtapna sang Malaria.
Suno kay Prof. Regalado, ang mosquito fish ang nagadaku sang 5 tubtub 7 cm, may yara sang maximum lifespan nga nagalab-ot sa tatlo ka tuig, mabuhi sa wide range temperature kag makabig nga voracious eater ukon palakaon.
Kabahin sa ginakaon sang mosquito fish amo ang mga insekto, lamok, mosquito larvae kag iban pa nga sahi sang isda kag living organism sa suba ukon sa baybay.
Ginpahayag ni Prof. Regalado nga santo sa mga pagtuon gikan sa iban nga pungsod, nagaguwa nga may yara sang bentaha kag disbentaha ang pagpadamu sang nasambit nga isda.
Mas makapaayo suno sa natungdan kun padamuon ang mosquito fish sa controlled environment kasubong sang aquarium ukon man-made fish pond ipaanggid sa suba sa diin madamu nga living organisms ang mahimo maapektuhan.
Tuhoy naman sa distribution sang mosquito fish sa mga lugar sa pungsod nga may yara sang Dengue outbreak, ginpahayag ni Porf. Regalado nga wala pa siya sang may nauyatan nga kopya sang mandu gikan sa gobyerno tuhoy diri.
Sa iya nga nahibalu-an suno kay Prof. Regalado amo nga ginadumili-an ang pag-transport sang nasambit nga species sang isda magluwas lang kun may yara sang pahanugot gikan sa gobyerno.
