ILOILO CITY – Ginsaway sang Metropolitan Manila Development Authority ang tuman ka damu nga pedestrian lane nga rason sang pagpugok sang trapiko sa syudad sang Iloilo.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga santo sa initial observation sang team sang Metropolitan Manila Development Authority nga nagpadulong sa syudad sang Iloilo sang damlag lang, tuman ka damu ang pedestrian lane sa diin ang iban sa mga ini ang wala man sang pulos.
Partikular nga gintumod sa initial observation amo ang tuman ka damu nga pedestrian lane sa Diversion Road ukon sa Sen. Benigno Aquino Jr. Avenue sa distrito sang Mandurriao.
Ang mga pedestrian lane sa nasambit nga dalan ang tuman ka ikit kun ipanggid sa standard distance kun tani nga 200 meters.
Ginhalimbawa man sang 12-man team gikan sa nasambit nga ahensya ang pedestrian lane sa atubang sang Casa Real kag Iloilo Provincial Capitol nga isa sa mga pedestrian lane nga gina-agyan sang madamu nga tawo kag salakyan sa sulod sang isa ka oras.
Sa subong, ginpahayag ni Conlu nga magalab-ot pa sa apat tubtub anum ka bulan bag-o makahatag sang final observation and recommendation sa Iloilo City Government ang Metropolitan Manila Development Authority.
