GUIMARAS- Nakabaton sang financial assistance ang mga crew sang mga pumpboats nga nagabyahe Iloilo -Buenavista, Guimaras and vice- versa.
Sa interview sang Bombo Radyo kay Buenavista Mayor Eugene Reyes, iya ginpahayag nga P1500 pesos ang ginhatag sang Department of Social Welfare and Development Region 6 sa kada isa sa masobra 220 ka mga crew sang mga motorbanca.
Magluwas diri, naghatag man sang 500 pesos sa kada isa sa ila ang opisina ni Guimaras Lone District Congresswoman Lucille Nava.
Suno kay Reyes, may kapin 20 pa ka mga crew ang wala pa nakabaton sa diin mahimo nila ini makuha sa opisina sang congresswoman.
Dugang pa sang alkalde, may nahatag naman nga tag- P5,000 ang Local Goverment Unit sang Buenavista sa tanan nga mga survivors sang nagkulob nga MB Jenny Vince.
Natalana naman nga maghatag ang Local Government Unit sang nasambit nga banwa sa pamilya sang mga casualty.
Nagalaum naman si Reyes nga magabulig man ang Department of Labor and Employment sa mga crew sang pumpboats, mga porters, mga tricycle kag trisikad driver nga apektado ang palangabuhian bangud sa pila ka semana nga pagpauntat sang byahe sang pumpboats kasunod sang trahedya.
