ILOILO CITY – Makabulig sa pagtuon sang mga estudyante ang ginahatag nga homework ukon assignment.
Ini ang reaksyon ni Assistant Regional Director Victor De Gracia Jr. sang Department of Education 6 sa ginaduso nga no homework policy.
Sa interview sang Bombo Radyo kay De Gracia, iya ginpahayag nga bilang isa ka homeroom teacher sadto, iya gid nahangpan kun ano ka importante ang homework sa school performance sang isa ka estudyante.
Suno kay De Gracia, ang pag-ubra sang homework ang makabulig sa pagpahangop sa isa ka estudyante kun ano ang kaundan sang gintudlo sa ila nga leksyon.
Magluwas diri, ginpahayag man ni De Gracia nga ang homework ang nagahatag sang bonding time sa tunga sang estudyante kag sang ginikanan.
Sa pagpaathag sang natungdan, nagakadapat nga tudlu-an sang mga ginikanan ang ila tagsa ka anak sa paghimu sang homework ukon assignment sa baylo nga ang mga ginikanan na lang ang mag-obra agud nga madali nga matapos.
Sa pagkamatuod suno kay De Gracia, ginapatuman na sang Department of Education ang no homework policy sa tion sang weekend agud nga mahatagan sang tion ang mga estudyante nga makapahuway.
Tuhoy naman sa pagduso sang no homework policy sa weekdays, ginpahayag ni De Gracia nga wala naman ini nagakabagay bangud kasubong nga ginatudlu-an ang mga estudyante nga magtinamad.
Kadungan sini, gin-athag sang natungdan nga nagakadapat nga pahanugutan sang school managament nga makakuha sang examination ang mga estudyante nga may yara pa sang balayran sa tuition.
