ILOILO CITY – Wala sang may nabaton nga sulat ukon dukomento gikan kay Iloilo City Mayor Jerry Treñas si Local Civil Registrar Chief Juncae Manikan.
Ini ang may kaangtanan sa ginapahayag 180 ka mga peke nga kasal nga ginparehistro sa Local Civil Registrar sa diin ang reklamo ang ginpasa na sang City Legal Office sa National Bureau of Investigation.
Sa interview sang Bombo Radyo kay Manikan, iya ginpahayag nga wala siya sang ihibalo kun sin-o ang utok sa pagpaguwa sang nasambit nga kontrobersiya.
Sa subong suno kay Manikan, wala siya sang nabaton nga sulat ukon dukomento gikan kay City Legal Officer Atty. Edgar Gil, Mayor Treñas ukon sa National Bureau of Investigation tuhoy sa patigayunon nga imbestigasyon.
Sa pagkamatuod suno kay Manikan, wala sang shortcut sa ginapatigayon nga proseso sa pag-apply sang marriage license.
Lakip sa proseso suno sa natungdan amo ang mga masunod:
- Magkuha sang Certificate of No Marriage sa Philippine Statistics Authority
- Mag-apply sang marriage license sa Local Civil Registrar sa diin nagalab-ot sa P150 ang balayran sang couple nga lunsay tumandok sang syudad sang Iloilo, P175 naman kun ang isa sa couple ang pangayaw samtang P200 naman kun ang isa sa couple ang foreigner.
- Magpa-schedule sang pre-marriage counselling
- Magpa-schedule sang tree planting activity sa General Services Office
- Magbalik sa Local Civil Registrar para sa releasing sang marriage license
Kadungan sini, gin-athag man ni Manikan nga nakadepende na sa couple kun sa diin sila nga lugar magapakasal bangud nga ministerial lamang ang katungdanan sang Local Civil Registrar.
