Ginakabig nga binutig ni Vice President Leni Robredo ang basehan sa pagpasaka sang sedition complaint sa iya sang Criminal Investigation and Detection Group.
Si Robredo ang isa sa mga ginatudlo nga may kaangtanan sa plano nga pagpahalin sa pwesto kay Presidente Rodrigo Duterte.
Pinaagi kay Peter Joemel Advincula, ang lalaki nga nagpakilala nga si Bikoy sa Ang Totoong Narcolist video kag nagatindog nga witness batuk sa bise presidente, iya ginpahayag nga nagtambong si Robredo sa pagsinapol kaupod ang mga myembro sang Otso Diretso magluwas kay anay Department of the Interior and Local Government chief Mar Roxas kag apat ka iban pa sa Ateneo de Manila University sang Marso 4.
Gina-alegar nga gindiskusyonan sang mga personalidad ang mga campaign strategies kag Project Sodoma agud gub-on ang Duterte administration.
Sa counter affidavit sang bise presidente, iya ginpahayag nga imposible para sa iya nga magtambong sa isa ka pagsinapol bangud yara siya sa Bulacan sang amo nga tion sa diin dokumentado ang iya paglakat kag gin-cover pa ini sang media.
Suno kay Robredo, yara siya sa Dr. Yanga’s Colleges Inc. agud nga maghatag sang mensahe sa mga student leaders, nagtambong man siya sa Ahon Laylayan Koalisyon planning session kag nakig-istorya sa mga women leaders nga naglawig humalin sang alas-10 sa aga tubtob alas-5 sang hapon.
Kaupod naman sang bise presidente ang iya mga staff pabalik sa iya balay 6:30 na sang gab-i.
Dugang pa sang natungdan, wala siya mismo sa Leong Hall sa Ateneo de Manila University sang Marso 4, 2019 kag imposible nga yara ang iya presensya sa alegasyon ni Advincula.
Matapos ang pormal nga pagsabat kag pagpadulong ni Robredo sa Department of Justice, iga-resume naman sang prosekyutor ang hearing sa Setyembre 6.
