CALUYA, ANTIQUE – Nakapauli na sa ila tagsa ka mga balay ang anum ka sakay sang motorbanca nga nagkapan sa Sibato Island, Caluya, Antique.
Sa interview sang Bombo Radyo kay Police Major Frankie Gatila, Officer-in-Charge sang Caluya Municipal Police Station, iya ginpahayag nga halin sa Panagatan 2 islet, Brgy. Harigue, Caluya, Antique ang MB Eliza kun sa diin sakay sanday Zaldy Delagracia Manungol, 54, Lina Malaluan, 66, Nemia Timbangcaya, 37, Jerome Timbangcaya, 4, Jecelyn Guillon, 19, kag Jan Niel Manungol, 20.
Suno kay Gatila, naabutan sang mabaskog nga ulan kag mamadlos nga hangin ang motorbanca nga ginasakyan sang anum ka biktima.
Ginpahayag ni Gatila nga magluwas sa anum ka sakay, may karga man ang motorbanca nga 500 ka sako sang seaweeds.
Bangud nga zero visibility tuga sang malain nga tiyempo, nakabunggo sa bato ang motorbanca rason nga nabuslot ang hull sini kag nagkapan.
Gilayon naman nga nakapadala sang communication ang mga biktima sa Caluya PNP rason nga madasig ang pagpatigayon sang joint rescue operation kaupod ang Philippine Coast Guard.
Natigayon naman nga naguyod pabalik sa higad sang baybay ang nagkapan nga motorbanca.
