ILOILO CITY – Nakapaguwa na sang notice of intent to revoke ang Business Permit and Licensing Office batok sa siyam ka commercial etsablishment nga naglapas sa Executive Order 46 ukon General Bar Guidelines may kaangtanan sa pagdula sang Liquor Ban sa syudad sang Iloilo.
Sa interview sang Bombo Radyo kay Mr. Norman Tabud, pinuno sang Business Permit and Licensing Office, iya ginpahayag nga subong nga adlaw sang ginpaguwa ang notice of intent to revoke kun sa diin nakasaad ang specific violations sang tagsa ka commercial establishment.
Suno kay Tabud, pagahatagan sang 10 ka adlaw ang siyam ka commercial establishment agud nga mag-comply sa guidelines kasubong sang pagpahamtang sang functional nga Closed Circuit Television camera kag Security Personnel ukon Bouncer.
Magluwas sa 10 days to comply, pagahatagan man sang 72 ka oras ang siyam ka commercial establishment agud nga makapaathag matapos nga nakitaan sang kapaltahan sang inspection team.
Nakadepende naman kay Iloilo City Mayor Jerry Treñas ang pagdesisyon kun bala bawi-an sang business permit ang mga commercial establishment nga nagalapas sang General Bar Guidelines.
