ILOILO CITY – Kalabanan sa transient vendors nga naapektuhan sang Oplan Hawan sa Iloilo Terminal Matket ang nagtambong sa ginpatigayon nga pagsinapol kahapon nga adlaw.
Ini ang kasunod sang pagsumpakilay sang Oplan Hawan team kag sang mga manugbaligya kadungan sang ginpatigayon nga clearing operation sa palibot sang merkado.
Sa interview sang Bombo Radyo kay Punong Barangay Woody Delariarte, anay Presidente sang vendor’s association sa nasambit nga merkado, iya ginpahayag nga magluwas sa transient vendors, ang pagsinapol ang gintambungan ni Local Economic and Enterprise Office Head Mr. Ariel Castañeda, Mr. JV Mabilog sang Public Safety and Transportation Management Office kag ni Mr. Eric San Agustin, market-in-charge sa Iloilo Terminal Market.
Suno kay Delariarte, may ginkasugtan na nga win-win solution may kaangtanan sa transient vendors nga naapektuhan sang Oplan Hawan.
Ginpahayag ni Delariarte nga may yara sang proposal si Castañeda nga pangitaan sang lugar sa sulod sang merkado ang apektado nga transient vendors apang kinahanglan pa ang approval ni Iloilo City Mayor Jerry Treñas.
Kun tani suno sa Punong Barangay, hatagan sang bisan 1 meter extension sa saguwa sang merkado ang transient vendors agud nga indi man sila madulaan sang palangabuhi-an.
