ILOILO CITY – Minimal ukon manubo ang kaso sang Dengue Hemorrahgic Fever sa Brgy. Tabuc Suba, Jaro, Iloilo City.
Sa interview sang Bombo Radyo kay Punong Barangay Joel Jabonillo sang nasambit nga lugar, iya ginpahayag nga wala nalakip ang Tabuc Suba sa listahan sang mga barangay nga may pinakamadamu nga kaso sang Dengue.
Suno kay Jabonillo, padayon ang clean-up drive sa ila lugar sa tagsa ka Sabado agud nga wala sang pugaran ang lamok nga nagadala sang balati-an.
Ginpahayag man ni Jabonillo nga santo sa latest data, nagalab-ot lamang sa masobra sa10 ang kaso sang Dengue sa ila lugar rason nga dapat padayunon sang mga pumuluyo ang pagpaninlo sa ila tagsa ka ugsaran.
Sa bahin naman sang waste segregation, ginpahayag ni Jabonillo nga wala pa sang Material Recovery Facility ang ila lugar.
Sa subong suno kay Jabonillo, ginatipon ang mga basura malapit sa atubang sang barangay hall.
Plano niya suno sa
Punong Barangay nga magpatukod sang Material Recovery Facility sa Sitio Ilaya.
Ginpahayag sang natungdan nga may yara sila sang ginasunod nga schedule sa paghaboy sang basura santo sa schedule sang pagkuha sang basurero.
Samtang, lima ka mga barangay kagawad ang maga-upod kay Jabonillo sa Lakbay Aral sa Setyembre 3 tubtob 7 sa Subic, Bataan kag Olongapo City.
Suno kay Jabonillo, madamu sila sang may mahibalu-an sa patigayunon nga Lakbay Aral kasubong sang pag recycle sang mga basura.
Sa pagkamatuod suno kay Jabonillo, applicable man sa ila lugar ang pag recycle sang basura apang kulang lang sila sa pasilidad.
Ginpahayag sang natungdan nga magluwas sa solid waste management, madamu ang ila matun-an sa Lakbay Aral.
