ILOILO CITY – Ginlunsyar na sang Bureau of Fire Protection 6 ang mobile application agud nga mas mapahapos kag mapadali ang pagreport kag ang pagresponde sa fire incident.
Sa interview sang Bombo Radyo kay Fire Inspector Mary Angelie Bolocon, tagpamaba sang Bureau of Fire Protection 6, iya ginpahayag nga ang “Fire Out 6” nga ginakabig nga isa ka technological breakthrough, ang ginlunsyar kadungan sang ika-28 nga founding anniversary kag ika-118 nga anibersaryo sang fire service.
Suno kay Bolocon, ang nasambit nga mobile application ang mahimo nga madownload apang limitado lamang sa smartphone kag tablet nga may yara sang android operating system.
Makita sa nasambit nga mobile application ang directory sang tanan nga fire stations sa rehiyon, balita may kaangtanan sa Bureau of Fire Protection, citizen’s charter, fire safety tips kag first aid tips.
May yara man ini sang special feature nga “respond on your report” sa diin mahimo nga makapasa sang laragway ang informant sa tion nga may yara sang sunog.
Bag-o magamit ang nasambit nga application, ang user ang kinahanglan nga mag log-in gamit ang mobile number.
Ang mga laragway nga ginapadala sang informant ang nagadirekta sa BFP command center kag paagi naman sa Google maps, matumod kun sa diin nga lugar nagluntad ang sunog.
Ginpahayag ni Bolocon nga ang “Fire Out 6” ang inisyatibo ni Fire Senior Supt. Roderick Aguto nga regional director sang Bureau of Fire Protection 6.
Magluwas sa fire incidents, katuyu-an sang ahensya nga makaresponde sa tion sang aksidente ukon emerhensya.
