ILOILO CITY – Iga-anunsyo na buwas nga adlaw ni Iloilo City Mayor Jerry Treñas kun ano ang pamatbat sa siyam ka commercial establishment nga naglapas sa Executive Order 46 ukon General Bar Guidelines kadungan sang pagdula sang Liquor Ban sa syudad sang Iloilo.
Sa interview sang Bombo Radyo kay Mr. Nestor Canong, pinuno sang Task Force on Moral Values and Formation, iya ginpahayag nga si Mayor Treñas gid ang maga-anunsyo kun bala ipasirado ukon indi ang mga commercial establishment nga naglapas sa pagsulundan.
Suno kay Canong, subong nga adlaw, nahatag na kay Mayor Treñas ang rekomendasyon sang composite team nga amo ang nagapatigayon sang inspection.
Ginpahayag ni Canong nga nakapasa man sang sabat ang mga commercial establishment apang ang maathag lang amo nga may yara gid sang penalty nga ihatag sa mga violator.
Magluwas sa siyam ka mga commercial establishment, natukiban man nga may dugang nga anum ka commercial establihsment nga wala sang business permit.
Nahibalu-an nga ang mga commercial establishment nga una na nga nakitaan sang violation amo ang mga masunod: Angel A Bar, Juan’s Martha Food Corp., Project X, Sinukad Seafood Restaurant, Bull and Barel, HQ Beercade, Floyd’s Famous BBQ, Paraiso Night Club kag Camp Jefferson Disco Pub.
