GUIMARAS- Nagalaum ang Guimaras Provincial Government nga matigayon ang ila hingyo nga congressional inquiry may kaangtanan sa Iloilo Strait tragedy nga ginkamatay sang 31 ka tawo.
Sa interview sang Bombo Radyo kay Guimaras Vice Governor John Edward Gando, iya ginpahayag nga napadala na sang probinsya sa kongreso ang resolution pinaagi kay Congresswoman Lucille Nava duha ka semana na ang nagligad.
Suno kay Gando, ila gin-address ini kay House Speaker Alan Peter Cayetano.
Ginpahayag ni Gando nga sa nasambit nga inquiry, plano nila nga patambungon ang mga katapo sang Philippine Coast Guard, Maritime Industry Authority, mga pumpboat operators, mga survivors kag iban nga involved sa nasambit nga insidente.
Dugang pa ni Gando, katuyuan sini nga lantawon ang mga kakulangan kag nangin problema antes kag pagkatapos natabo ang trahedya sang mga natungdan nga ahensya sang gobyerno partikular na ang Philippine Coast Guard.
Samtang, tinguhaan naman ni Cong. Lucille Nava sang Lone District of Guimaras nga ma-file sa pinakamadali nga panahon ang nasambit nga resolution.
Suno kay Nava nga na-admit pa sa ospital sa subong, hingagawon niya ini kun makabalik na siya sa kongreso.
Ginpahayag man ni Nava nga sa subong, masako pa ang kongreso sa budget hearing kag wala pa na-organize ang kumitiba nga magauyat sang nasambit nga congressional inquiry.
Samtang ginkumpirma ni Nava nga indi anay magbayad sang terminal fee nga P20.00 ang mga pasahero nga nagatabok halin sa Iloilo padulong sa Guimaras nga nagasakay sa MV Yohan nga nagadungka sa Fort San Pedro.
Suno kay Nava, ginhingyo niya kay Philippine Ports Authority General Manager Jay Daniel Santiago nga indi anay pagpatuman ang terminal fee nga natalana kuntani sang Setyembre 1 ginpatuman.
Ginpahayag sang congresswoman nga tuman ka mahal ang P20 nga terminal fee kag wala man ini nag-agi sa public hearing.
Dugang pa sang opisyal, indi pagpabaydon sang terminal fee ang mga pasahero nga nagatabok gikan sa Iloilo kun wala pa sang pormal nga kasugtanan ukon public hearing tuhoy diri.
