ILOILO CITY – Epektibo subong nga adlaw ang 5-day closure batok sa 9 ka commercial establishment nga una nga nakitaan sang kapaltahan sa pagsunod sang Executive Order 46 ukon General Bar Guidelines.
Sa interview sang Bombo Radyo kay Mr. Norman Tabud, pinuno sang Business Permits and Licensing Office, iya ginpahayag nga pagkatapos sang annoucement ni Iloilo City Mayor Jerry Treñas, gilayon nga ginpanghatag ang notice of closure batok sa siyam ka commercial establishment.
Suno kay Tabud, wala man sang may nagpamalibad sang ginserbe sang composite team ang notice of closure.
Ginpahayag ni Tabud nga walo sa siyam ka commercial establishment ang nakapasa sang paathag kun nga-a wala nila natuman ang nakasaad sa General Bar Guidelines.
Kinahanglan man nga makapasa sang affidavit of under taking ang siyam ka commercial establishment bilang tanda sang ila promisa nga indi maglapas sa pagsulundan.
Sa tion nga mapaslawan ang mga nasambit nga commercial establishment, permanent closure na ang igasilot sa ila.
Samtang, ginpahayag man sang natungdan nga pagahatagan sang due process ang dugang nga mga commercial establishment nga nakitaan sang kapaltahan.
Nahibalu-an nga nalakip sa mga commercial establishment nga una nga nakitaan sang kapaltahan amo ang mga masunod: Angel A Bar, Juan’s Martha Food Corp., Project X, Sinukad Seafood Restaurant, Bull and Barel, HQ Beercade, Floyd’s Famous BBQ, Paraiso Night Club kag Camp Jefferson Disco Pub.
