ILOILO CITY – Ginkwestyon sang operator sang Paraiso Night Club kun nga-a nalakip sila sa mga commercial establishment nga ginhatagan sang 5-day closure bangud sa paglapas sa Executive Order 46 ukon General Bar Guidelines.
Sa interview sang Bombo Radyo kay Mayor Mike Escolin sang President, Roxas Capiz kag operator sang nasambit nga club, iya ginpahayag nga sang nagpatigayon sang inspection ang composite team sang Agosto 22-23, matuod nga wala sang functional nga Closed Circuit Television camera kag wala sang Security Guard sa sulod sang commercial establishment.
Suno kay Escolin, indi man mahinago nga sang si anay Iloilo City Mayor Jose Espinosa III pa ang alkalde, ginpatuman ang Liquor Ban rason nga nagpigado ang kita sang mga bar kag night club.
Ini ang rason kun nga-a wala sila sang pondo agud nga ibakal sang functional nga Closed Circuit Television camera kag inugbayad sa security personnel.
Isa ka adlaw matapos ang inspection, ginpahayag ni Escolin nga gilayon nila nga gin-comply ang kakulangan kag gilayon nga ginpahibalo ang composite team nga ila na natuman ang mga nakasaad sa General Bar Guidelines.
Pagkasunod naman nga adlaw, ginhatagan sila sang composite team sang checklist nga nagapamatuod nga wala na sila sang violation apang ginkakibot na lang nila suno sa natungdan nga nalakip ang Paraiso Night Club sa mga ginhatagan sang temporary closure.
Samtang suno naman kay Mr. Norman Tabud, pinuno sang Business Permits and Licensing Office, may yara sang ‘misunderstanding’ ukon pagsalangisag nga natabo.
Suno kay Tabud, bisan nga na-comply sang commercial establishment ang nasaad sa General Bar Guidelines apang ang ginabasehan sang composite team amo ang adlaw kun san-o ginpatigayon ang inspection.
Ginpahayag ni Tabud nga sang adlaw nga nagpatigayon sang inspection, nakitaan sang kapaltahan ang Paraiso Night Club rason nga nalakip ini sa ginhatagan sang 5-day closure.
