ILOILO – Usisaon ni Iloilo Provincial Administrator Atty Suzette Mamon ang video clip nga may yara ang Civil Service Commission sa diin ginapahayag nga may mga empleyado sa sulod sang kapitolyo nga wala naga ubra sang ila nga trabaho.
Sa interview sang Bombo Radyo kay Atty Mamon, iya ginpahayag nga i-review niya ang video agud nga mahibaluan kun ano nga opisina kag kun sin-o ang mga personnel nga nagkaladakpan sang Civil Service Commission.
Gina-alegar nga wala sa ila tagsa ka mga opisina ang mga empleyado apisar nga wala sang noon break ang government offices, nagagamit sang cellphone para sa social media kag nagagamit sang computer sang opisina agud nga mag online shopping.
Suno kay Mamon, sa tion nga matsekyar na niya video clip, makigkita siya gilayon subong nga adlaw sa mga opisina nga ginatumod sang Civil Service Commission kag amo man sa Human Resource Office agud nga maathagan kag masolbar ang natabo.
Nahibaluan nga magluwas sa mga empleyado, may mga pulis man nga nakuhaan sang picture nga nagagamit sang cellphone samtang nagatrabaho sa Police Assistance Desk sa kapitolyo.
