ILOILO CITY – May yara sang gina-uyatan nga mga pamatuod ang Task Force on Moral and Values Formation tuhoy sa ginapahayag sex den sa sulod sang Iloilo Terminal Market.
Ini ang sa pihak sang pagpanginwala sang mga market vendor nga nagaserbe nga sex den ang papag nga yara sa ibabaw sang tagsa ka stall.
Sa interview sang Bombo Radyo kay Mr. Nestor Canong, pinuno sang Task Force on Moral and Values Formation, iya ginpahayag nga bag-o pa man nabalahuba ang tuhoy sa sex den, nauna na nga narescue ang 14 ka mga menor de edad nga nadakpan nga nagapatigayon sang hazing sang nakaligad nga Biyernes sang tungang gab-i.
Suno kay Canong, may yara sang ihibalo ang mga manugbaligya nga may yara sang initiation rights nga nagakatabo lakip na ang ginpahayag pagbugaw sa mga menor de edad.
Kalabanan sa customers amo ang mga jeepney kag tricycle driver lakip na ang mga trabahador sa nasambit nga merkado.
Magluwas diri, ginpahayag sang natungdan nga may yara man sila sang nauyatan nga mga laragway kag video bilang pamatuod apang indi lang ini mapaguwa sa media bangud nga mga menor de edad ang involved.
