ILOILO CITY – Todo panginwala ang 26 anyos nga lalaki sang Zone 1 Brgy. Bo. Obrero, Lapuz, Iloilo City matakop nadakpan sang mga otoridad sa drug buy bust operation sa Tanza, Baybay, City Proper.
Ang subject sang operasyon ang ginkilala nga si John Paul Tusing.
Sa interview sang Bombo Radyo kay Tusing, iya ginpahayag nga nagdul-ong lamang siya sang iya barkada sa Tanza, Baybay sang gilayon lamang siya nga gindakop sang mga pulis.
Suno kay Tusing, indi iya ang mga sachet sang shabu nga nakuha sang otoridad.
Handa man siya nga magpa drug-test kun kinahanglan. Samtang, ginpahayag naman ni Pol. Maj. Engelber Banquillo, hepe sang Molo Police Station, newly identified drug personality si Tusing.
Isa man ka semana suno kay Banquillo nga gin-monitor ang subject sa iligal niya nga aktibidad tubtob nga ginpatigayon ang operasyon.
Dugang pa sang hepe, nabaklan sang isa ka sachet sang suspected shabu ang subject balor P2,100 samtang na rekober naman ang apat pa ka sachet sa sulod sang iya nga coin purse.
