ILOILO CITY – Magapatigayon sang pagsinapol ang Task Force on Moral and Values Formation subong nga adlaw kaupod ang mga ginikanan sang menor de edad nga na rescue sa Iloilo Terminal Market.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga magalaygay na naman sila sa mga ginikanan sang mga kabataan nga ila nadakpan nga nagaliho-liho sa Super nga lapaw na ang alas-10 sang gab-i.
Suno kay Canong, luyag niya mahibaluan ang bahin sang mga ginikanan kun ngaa ginapabay-an nila ang ila kabataan nga maglagaw nga tuman na ka gab-i.
Sa tion nga madakpan sa liwat ang mga kabataan matapos ang pagpakigsapol sa ila tagsa ka mga ginikanan, indi magduha-duha ang task force on moral and values formation nga pasakaan ang ila mga ginikanana sang kaso.
May mga bulig naman nga igahatag ang Iloilo City Government sa mga kabatan nga out of school youth sa diin tinguhaan sang gobyerno nga mapa-eskwela sila pinaagi sa paghatag sang scholarship ukon pagpasulod sa ila sa Alternative Learning System.
