ILOILO CITY – Kinahanglan nga sundon sa gihapon kun ano ang nakasaad sa layi may kaangtanan sa pagpatuman sang plea bargaining.
Sa interview san Bombo Radyo kay Philippine National Police Chief Police General Oscar Albayalde, iya ginpahayag nga kinahanglan sundon ang layi may kaangtanan sa plea bargaining ukon ang kasugtanan sa tunga sang prosecutor kag sang akusado nga mag-plead quilty sa kaso agud nga mapanubo ang pamatbat nga silot.
Suno kay Albayalde, kun may mga preso nga nakaguwa bangud sa plea bargaining kag nagbalik sa illegal nga buluhaton, indi magkangilin ang mga pulis nga dakpon sa liwat ang mga nakahimu sang sala.
Mangin hugot man ang monitoring sa mga anay preso nga nakaguwa sa presuhan kag namutikan nga nagabalik sa kun ano man ang ila ginabuhat sadto nga malain.
Nahibaluan nga sa Western Visayas, nagdangat sa 1,076 ka mga preso nga may kaso may kaangtanan sa illegal drugs ang nakaguwa bangud sa plea bargaining agreement.
Samtang, gindayaw man sang PNP Chief ang performance sang Police Regional Office 6 sa pagtapna sang krimen.
Ang Police Regional Office 6 ang ginpasidunggan bilang Best Performing Personnel kag Unit.
Nahibalu-an nga nagpadulong sa syudad sang Iloilo si Albayalde agud magserbe nga dinapit nga bisita sa ika-118 nga anibersaryo sang police service.
