ILOILO CITY – Magapatigayon sang exploratory hearing ang Iloilo City Council tuhoy sa ginapahayag sex den sa sulod sang Iloilo Terminal Market.
Sa interview sang Bombo Radyo kay Iloilo City Councilor Jojo Javellana, chairman sang Committee on Moral Recovery, iya ginpahayag nga ang hearing ang patigayunon sa Miyerkules, Setyembre 11.
Suno kay Javellana, mangin kabulig niya sa pag-usisa tuhoy sa ginapahayag sex den sa sulod sang nasambit nga merkado amo si Iloilo City Councilor Ely Estante, chairman sang Committee on Market and Slaughterhouse.
Ginpahayag ni Javellana nga kinahanglan nga mauntat ang kasubong nga buluhaton bangud nga ang mga minor de edad ang makaluluoy.
Sa iya nga pagkahibalo suno sa natungdan, napangguba na ang ginapahayag papag sa ibabaw sang tagsa ka stall.
Magluwas diri, ginahingyo man sang opisyal nga pahamtangan sang police personnel ang palibot sang merkado agud nga matapna na ang ginapahayag sex for sale ilabi na sa tion sang kagab-ihon.
