ILOILO CITY – Ginakabig ni anay Iloilo City Councilor Plaridel Nava nga harassment ang pagpasaka sang kaso nga falsification of public documents sang Panay Electric Company sa ila nanday anay Iloilo City Councilor Joshua Alim kag Presidential Adviser for Western Visayas Jane Javellana.
Ini ang may kaangtanan sa gina-alegar sang Panay Electric Company nga pagpeke nanday Nava, Alim kag Javellana sang mga pirma sa petition batuk sa PECO.
Sa interview sang Bombo Radyo kay Nava, iya ginpahayag nga wala sang basehan ang pagpasaka sang kaso sang PECO sa ila.
Nagpasalig naman si Nava nga sa Setyembre 11, magatambong sila sa Preliminary investigation sa Department of Justice dala ang ila counter affidavit batuk sa PECO matapos nga wala makatambong sang Setyembre 4.
Suno kay Nava, imposible nga makatambong siya sa korte sang Seyembre 4 bangud nabaton lamang niya ang subpoena Setyembre 3 na kag 1 day notice lamang.
Pahayag pa sang anay konsehal, mahimo ginakonsiderar sila nga rason sang PECO kun ngaa nagakabudlayan ini magkuha sang prangkisa.
Apang paathag ni Nava, wala sila makapresentar sa kongreso sang signature campaign ukon petition batuk sa PECO bangud si Alim lamang ang ginpahanugutan nga maghambal apang tatlo ka minutos gid lamang ang ginhatag sa iya nga kahigayunan.
Samtang sa Senado naman, ginpahanugutan man sila nga maghatag sang ila nga bahin apang wala naman na diskusyonan ang tuhoy sa PECO bangud ang prangkisa sang More Electric and Power Corp. gin-istoryahan.
Mahimo nga nagatimalos lamang ang PECO sa ila agud nga halitan sila halimbawa diri amo ang pagpadulong nila sa Manila agud nga makatambong sang hearing nga mahimo man nga sa Iloilo kuntani.
Apang 100% nga nagapati si Nava nga ibasura man sa gihapon sang Department of Justice ang kaso nga ginpasaka sa ila sang PECO.
