Wala sang legal nga basehan nga arestuhon sa liwat ang mga convicts sang heinous crimes nga nakabenepisyo sa Good Conduct Time Allowance bangud wala man sila sang may nahimo nga krimen matapos maangkon ang kahilwayan.
Sa interview sang Bombo Radyo kay Atty. Leo Superio, iya ginpahayag nga kun may sala sa paghatag sang Good Conduct Time Allowance sa isa ka preso, mahimo nga ma recall kag mabawi ang release order apang ang ginhatag nga Good Conduct Time Allowance ang indi na mabawi bangud maathag sa layi nga kun ginhatag na ini sa isa ka convict, indi na ini ma-revoke.
Suno kay Superio, tagsa ka bulan ginahatag ang Good Conduct Time Allowance sa convict kun wala ini sang may ginlapas sa pagsulundan ukon sa layi.
May yara sang 30 ka adlaw nga kahilwayan ang isa ka convict kun mahatagan siya sang Good Conduct Time Allowance sa isa ka bulan.
Pahayag pa niya, ang may poder lamang nga maghatag sang Good Conduct Time Allowance amo ang director sang Bureau of Corrections, Chief sang Bureau of Jail Management and Penology kag Provincial Jail Warden.
Kinahanglan nga may yara sang due process ang pag-aresto sa isa ka tawo sa diin nagakadapat nga may yara ini sang warrant of arrest.
Apang dugang pa sang natungdan, mas maayo nga magsunod na lamang ang mga convicts sa pronouncement ni Presidente Rodrigo Duterte nga magparehistro sa Bureau of Corrections, sa militar man ukon sa pulis agud nga ipahibalo nga wala ang mga ini sang plano nga magpalagyo.
