ILOILO CITY – 24 ka mga Ilonggo Math wizard ang nagpangibabaw sa Hong Kong International Mathematical Olympiad nga ginpatigayon sang Agosto 30 tubtub Setyembre 2, 2019 sa Ling To Primary Catholic School sa Ho Man Tin, Hong Kong.
Sa interview sang Bombo Radyo kay Jose Michael Gaje, Iloilo Cordinator para sa Hong Kong International Mathematical Olympiad, iya ginpahayag nga ang 24 ka mga Ilonggo Math wizard ang ginabug-usan sang mga estudyante gikan sa Kindergarten tubtub sa Grade 9 nga nakakuha sang isa ka world star trophy, duha ka champion trophies, 22 ka medals kag duha certificates.
Nagpangibabaw gikan sa madamu nga delegado gikan sa 19 ka mga pungsod ang 24 ka young Ilonggo pride sa nasambit nga kompetisyon matapos nakakuha sang walo ka gold medals, walo ka silver medals anum ka 6 bronze medals kag duha ka merit awards.
Kabahin sa mga highlight amo ang grade 5 student nga si Matthew Defensor sang Solomon Integrated School de Iloilo nga nakakuha sang World Star Trophy bilang tanda nga siya ang may pinakamaayo nga performance sa mga delegado sang Pilipinas.
Magluwas diri, nakuha man ni Matthew Defensor ang Champion Trophy bilang World Champion sa iya grade level.
Nakakuha man sang Bronze medal ang manghod ni Matthew nga si Naomi Defensor sa Kindergarten level kag pinakabata sa mga delegado sang Pilipinas.
Sanday Matthew kag Naomi ang anak ni Iloilo City Police Office Director Police Col. Martin Defensor Jr.
Ginpahayag ni Gaje nga bugal para sa Iloilo ang kadalag-an sang 24 ka mga estudyante.
Sa subong, ginahandaan na nila suno kay Gaje ang World International Mathematical Olympiad nga patigayunon sa Disyembre 28-29 sa Tokyo, Japan.
Samtang, suno naman kay Matthew Defensor, ang nakakuha sang World Star Trophy kag Champion Trophy, ang iya mga ginikanan ang iya nangin inspirasyon.
Ginpahayag ni Defensor nga wala niya ginlauman nga siya ang magapangibabaw sa kompetisyon kag bugal para sa iya nga makadala sang kadungganan sa Pilipinas.
Sa iya lamharon nga edad, ginpahayag ni Defensor nga huyog gid niya ang pagtuon sang Mathematics.
