ILOILO CITY – Padayon ang pagpaninlo sa Barangay MH Del Pilar, Jaro, Iloilo City agud nga matapna ang Dengue Hemorrhagic Fever.
Sa interview sang Bombo Radyo kay Punong Barangay Larry Palomo, iya ginpahayag nga sa tagsa ka Sabado nga adlaw, nagapatigayon sila sa pagpaninlo.
Suno kay Palomo, lakip sa ila nga ginatinlu-an amo ang pangpang sang suba malapit sa ila lugar.
Sa maayo nga palad suno sa natungdan, wala man nagduging ang Dengue sa ila barangay.
Samtang, ginpahayag ni Palomo nga sa ila lugar, indi madata ang obstruction sa dalan.
Suno sa Punong Barangay, ginasaway nila nga mga barangay official lakip sang mga barangay tanod ang mga driver nga naga-aprking sang ila salakyan sa higad sang dalan.
Nagpaandam man ang natungdan sa mga dungol nga driver nga iya kuhaan sang laragway ang mga
salakyan nga gin-parking sa higad sang dalan kag iya ini nga ipasa sa Oplan Hawan team agud nga ipaguyod sa tow truck.
Kun tuhoy naman sa Material Recovery Facility, ginpahayag ni Palomo nga ang ila basurahan ang nahamtang sa San Francisco Village.
Suno kay Palomo, ginaputos sa plastic ukon sako ang mga basura agud nga indi maglapta.
Ginpahayag ni Palomo nga may yara man sang schedule ang pagkuha sang mga basurero sang basura.
Sa pagkamatuod suno kay Palomo, iya na nga ginpadal-an sang sulat ang mga pumuluyo agud nga sundon ang waste segregation.
Wala sang may nag-upod nga barangay official sang MH Del Pilar, Jaro sa ginpatigayon nga Lakbay aral.
Sa pagpaathag ni Palomo, masako siya sang mga nakaligad nga semana ilabi pa nga nagahilapit ang fiesta sa ila lugar.
Ginpahayag ni Palomo nga iya nga ginpasulabi ang pagproseso sang mga transaction may kaangtanan sa patigayunon nga aktibidad sa ila lugar.
Tuhoy naman sa kontrobersiya sa Lakbay Aral, ginpahayag sang natungdan nga indi siya makahatag sang sabat kun nga-a nag-upod ang iban nga mga barangay official sa nasambit nga lugar.
