ILOILO CITY– Magapatigayun pa sang pagsinapol ang National Food Authority kag ang may kaangtanan sa problema sang mga mangunguma sa pagnubo sang presyo sang humay.
Sa interview sang Bombo Radyo kay San Enrique Mayor kag LMP President Mayor Trexie Fernandez, iya ginpahayag nga magapakigsapol sila agud makapangita sang nagakaigo nga solusyon sa problema sang mga mangunguma sa probinsya.
Suno kay Fernandez, may yara sang naka-schedule nga pagsinapol sa Setyembre 11 agud makadihon na sang konkreto nga plano ang lokal nga gobyerno agud mabuhinan ang pag-agunto sang mga mangunguma sa nangin epekto sang Rice Tarrification Law.
ng problema naman suno kay Fernandez amo nga wala sang budget ang mga local government unit sa pagbakal sang humay para sa mga mangunguma.
Sa subong, nagapatapos na ang tuig kag mabudlay ang pagpangita sang budget.
Maayo na lang suno kay Fernandez kun dako ang income sang isa ka banwa bangud may posibilidad nga may extra pa nga budget ang mga ini nga makabulig sa mga mangunguma.
Para naman sa mga banwa nga magagmay ang income kag nagasalig lang sa Internal Revenue Allotment, may posibilidad nga mangin negative na ang budget.
Sa subong suno sa natungdan, nakabakal na ang National Food Authority sang mga napamala na nga humay sang mga mangunguma sa balor nga P20 per kilo apang sila sa LMP ang magasapol man para sa nagakaigo nga solusyon.
