ILOILO – Walo na ka mga preso nga nahatagan sang Good Conduct Time Allowance ang nagsungka sa mga police station sa Western Visayas.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ang mga anay preso ang boluntaryo nga nagsungka matapos ang panawagan ni Presidente Rodrigo Duterte.
Suno kay Malong, ang walo ang indi makabig nga arestado bangud nga wala man sila sang nabuhat nga sala kag epektibo sa gihapon ang ila nga release order.
Ginpahayag ni Malong nga ang walo ka anay preso ang ginpaidalom lang sa booking purposes ukon ginkuhaan data kag laragway.
Sa pagkamatuod suno kay Malong, mismo ang mga anay preso pa ang naghatag sang ila contanct number kag address agud nga mahapos sila nga matultulan sa tion nga imandu sang Bureau of Corrections nga ibalik sila sa presuhan.
