ILOILO CITY – Duha lamang ka mga pwertahan sa Iloilo Terminal Market ang pagabuksan sa tion sang Curfew for Minors.
Ini ang isa sa nakita nga pamaagi sang Local Economic Enterprise Office agud nga matapna ang ginapahayag sex for sale sa nasambit nga merkado sa diin mga minor de edad ang involved.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga iya na nga napahibalo ang Iloilo City District Engineering Office agud nga kaayuhon ang mga guba nga pwertahan kag busluton nga mga dingding sang merkado.
Suno kay Castañeda, sa tion nga makay-o na ang mga gubaon nga pwerta kag lusbuton nga ding-ding, duha na lang ka mga pwertahan ang pagabuksan agud nga malimitahan ang mga nagaguwa-sulod sa merkado.
Magluwas diri, ginpahayag man ni Castañeda nga pahamtangan sang functional nga Closed Circuit Television camera, dugang nga suga kag enforcer ukon police personnel ang palibot sang merkado.
Samtang, nagapati naman ang isa ka manugbaligya sa nasambit nga merkado nga matuod ang isyu sa sex for sale.
Sa interview sang Bombo Radyo kay Milagros Vargas, iya ginpahayag nga 45 ka tuig na siya nga nagabaligya sa Iloilo Terminal Market.
Suno kay Vargas, indi man mabalahuba ang tuhoy sa sex for sale ukon sex den kun indi matuod.
Sa pagkamatuod suno kay Vargas, mismo ang iya stall ang ginbuslutan agud nga may lutsan ang nagasulod sa merkado sa tion sang gab-i.
Ini ang rason suno kay Vargas kun nga-a ginpabutangan niya sang kudal ang iya stall.
