ILOILO CITY – Nagahingyo ang pinuno sang Task Force on Moral and Values Formation nga indi na pagdugang-dugangan ang isyu tuhoy sa ginapahayag sex den sa Iloilo Terminal Market.
Kadungan sang ginpatigayon nga media forum nga gintambungan sang mga tiglawas sang nasambit nga task force, Women and Children’s Protection Desk, City Social Welfare and Development Office, Philippine National Police kag Task Force on Internet and Gaming Centers and Anti-Piracy, ginpahayag ni Canong nga kun tani, likawan sang mga katapo sang media ang pag sensationalize sang balita tuhoy sa ginapahayag sex for sale sa nasambit nga merkado.
Suno kay Canong, kalabanan sa mga naangot sa sex for sale amo ang mga minor de edad.
Ginpahayag ni Canong nga mahimo nga makatuga sang negatibo nga epekto sa mga minor de edad ang pagdugang-dugang sang balita.
Magluwas sa negatibo nga epekto sa mga minor de edad, ginpahayag sang natungdan nga ang pagdugang-dugang sang balita ang nagatuga man sang pagsalangisag sa pahayag sang mga opisyal sang composite team nga nagapatigayon sang pag-usisa sa nasambit nga isyu.
Samtang, wala anay sang may igapaguwa nga detalye ang Local Economic Enterprise Office sa imbestigasyon sa ginapahayag sex for sale sa Iloilo Terminal Market.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga ginmandu sa iya ni Iloilo City Mayor Jerry Treñas nga indi anay maghatag sang detalye agud nga indi man maapektuhan ang ginapatigayon nga imbestigasyon.
Suno kay Castañeda, ginakabig sang alkalde nga confidential ang mga detalye nga matipon.
Kun tani suno kay Castañeda, mahangpan sang mga katapo sang media ang nangin mandu sang alkalde.
Sa pihak sini, ginpasalig sang natungdan nga mangin dedikado siya sa iya trabaho.
