ILOILO CITY- Ginkumpirma sang punong barangay sang Cabugao Norte, Sta. Barbara, Iloilo nga gindangop na sa iya ang tuhoy sa agaway sa duta sa tunga sang ginluthang-patay nga tigulang sa Cabugao Norte, Sta. Barbara, Iloilo kag sang iya man lang paryente.
Sa interview sang Bombo Radyo kay Punong Barangay Hitler Jaspe, iya ginpahayag nga sang nagligad nga bulan, ginpatawag niya ang biktima nga si Jilcito Bacanto, 72 anyos kag iya tiya nga si Marietta Jagunap Caen agud husayon kuntani ang ila problema sa duta.
Ini matapos nga ginhingyo ni Caen kay Bacanto nga indi pagtandugon ang duta bangud nga ginakaso pa nila ini apang nagpakatig-a ang biktima kag ginpadayon ang pag-atender sang duta.
Suno sa barangay official, iya na ginpapanaog ang settlement sang duha ka partido sa Lupong Tagapamayapa sang barangay.
Dugang pa ni Jaspe, natalana pa kuntani liwat nga mag-atubangay sa barangay subong nga semana ang magtimbang nga partido agud husayon ang ila problema sa duta.
